પંજાબના મુક્તસરમાં શિક્ષણ વિભાગ તરફથી પૈસા ન મળવાને કારણે, બ્લોક સ્તરની સરકારી પ્રાથમિક શાળાઓમાં ચાલી રહેલી રમત માટે શિક્ષકો પોતાના ખિસ્સામાંથી ફાળો આપી રહ્યા છે. મુક્તસર ડીઇઓ (પ્રાથમિક) પ્રભજોત કૌરના જણાવ્યા અનુસાર, શાળામાં બ્લોક લેવલની રમત ચાલી રહી છે, પરંતુ સરકારે કે મુખ્યમંત્રી એ હજુ સુધી અમને પૈસા આપ્યા નથી. એક સરકારી પ્રાથમિક શાળાના શિક્ષકે જણાવ્યું હતું કે દરેક શાળાએ વિદ્યાર્થીઓ માટે નાસ્તો અને પરિવહન, ઈનામો અને અન્ય વ્યવસ્થાઓ પર લગભગ 5,000 રૂપિયા ખર્ચવા પડે છે.
શિક્ષકે કહ્યું, “સરકાર માત્ર રમતોનું આયોજન કરવાનો આદેશ આપે છે, પરંતુ અમને ક્યારેય પૈસા આપતી નથી. પૈસા વિના દર વખતે રમતોનું આયોજન કેવી રીતે શક્ય છે? વિદ્યાર્થીઓ પાસે રમતગમતમાં ભાગ લેવા માટે જરૂરી કપડાં પણ નથી. રાજ્ય સરકારે રમતગમતને પ્રોત્સાહન આપવા માટે નાણાં ફાળવવા જોઈએ.” બીજી તરફ એમની જ પાર્ટીના કન્વીનર ગુજરાતમાં આવીને મફતની જાહેરાતો કરે છે. અને જાણે પોતે આપતાં હોય એમ મફતની લ્હાણીઓ કરે છે!
વિવિધ પ્રકારની રમતોનું આયોજન કરવામાં આવે છે
અન્ય એક સરકારી પ્રાથમિક શાળાના શિક્ષકે કહ્યું, “એથ્લેટિક્સ, જિમ્નેસ્ટિક્સ, ચેસ, કરાટે, સ્કેટિંગ, કબડ્ડી, ખો-ખો, કુસ્તી, ફૂટબોલ અને સ્વિમિંગ સહિતની રમતોનું આયોજન કરવામાં આવી રહ્યું છે. મેચ યોજવાની તૈયારી, વિદ્યાર્થીઓના પરિવહન અને ઈનામની રકમનો મોટો ભાગ ખર્ચવામાં આવે છે. અમે શાળા સ્તરે નાણાંનું યોગદાન આપીએ છીએ અને પછી તે ટુર્નામેન્ટ આયોજક સમિતિને આપીએ છીએ.
“શાળાઓમાં શારીરિક શિક્ષણ શિક્ષકની જગ્યા નથી”
દરમિયાન, ETT ટીચર્સ એસોસિએશન, મુક્તસરના પ્રમુખ રણજિત સિંહે જણાવ્યું હતું કે, “વિભાગ અમને ક્લસ્ટર, બ્લોક અથવા જિલ્લા સ્તરે રમતોનું આયોજન કરવા માટે પૈસા આપતું નથી. કેટલીક સંસ્થાઓમાં 400 વિદ્યાર્થીઓ હોવા છતાં પણ પ્રાથમિક શાળાઓમાં શારીરિક શિક્ષણ શિક્ષકની કોઈ જગ્યા નથી.
કેન્દ્ર સરકારે 2022-23માં રમતગમતના બજેટમાં વધારો કર્યો છે
તમને જણાવી દઈએ કે આ વર્ષના બજેટમાં કેન્દ્ર સરકારે ગયા વર્ષની સરખામણીમાં રમતગમત પર વધુ ખર્ચ કરવાની જાહેરાત કરી છે. ગયા વર્ષે ટોક્યોમાં યોજાયેલી ઓલિમ્પિક અને પેરાલિમ્પિક ગેમ્સમાં ભારતીય ખેલાડીઓએ ઐતિહાસિક પ્રદર્શન કર્યું હતું. જે બાદ આ વખતના બજેટમાં આને ધ્યાનમાં રાખીને સરકારે રમતગમતના બજેટમાં 305.58 કરોડ રૂપિયાનો વધારો કર્યો હતો. સરકારે નાણાકીય વર્ષ 2022-23 માટે ગેમ્સ માટે કુલ રૂ. 3,062.60 કરોડ ફાળવ્યા હતા.
